گیت
مینوں کیوں چھُڑینائیں میرا کی قصور اے
ودا موڈھے دینائیں میرا کی قصور اے
میرا دل صَفا ہے بےایمانی کائی نئیں
تیری کیتی کدی نافرمانی کائی نئیں
مُکھ کیوں مُڑینائیں میرا کی قصور اے
مینوں کیوں چھُڑینائیں میرا کی قصور اے
ہک تیتھوں وَکھرا گل لایا کوئی نئیں
کسے بندے نوں میں نال ٹُرایا کوئی نئیں
وادھے کیوں کرینائیں میرا کی قصور اے
مینوں کیوں چھُڑینائیں میرا کی قصور اے
میرا ساتھ دیندوں میرے نال رہئیں ہا
کجھ میری مجبوری داؤں ائی ویکھ لئیں ہا
وسوں کیوں بھنینائیں میرا کی قصور اے
مینوں کیوں چھُڑینائیں میرا کی قصور اے
توں ایں مرضی آلا میرا زور کوئی نئیں
تیرے ”درؔد؎“ ہزاراں میرا ہور کوئی نئیں
دھکے کیوں مرینائیں میرا کی قصور اے
مینوں کیوں چھُڑینائیں میرا کی قصور اے
No comments:
Post a Comment