گیت
شالا چیئنی بھارے توڑ دے جدے نویاں نویاں لائیاں نی
سائیں بنڑنی اوکھے موڑ دے جدے نویاں نویاں لائیاں نی
اسیں غریب کنگال کسیرے
پچ پونی بھائیوال اُچیرے
ہِن واقعی تیرے جوڑ دے جدے نویاں نویاں لائیاں نی
سائیں بنڑنی اوکھے موڑ دے جدے نویاں نویاں لائیاں نی
ساڈیاں آہن پاٹیاں لیراں
آ گئیاں تیرے ہتھ جاگیراں
لبھ گئے نی سجنڑ کروڑ دے جدے نویاں نویاں لائیاں نی
سائیں بنڑنی اوکھے موڑ دے جدے نویاں نویاں لائیاں نی
اسیں تیرے معیار دے ناسے
قابل تیرے پیار دے ناسے
اُنہاں مگر اسانوں چھوڑ دے جدے نویاں نویاں لائیاں نی
سائیں بنڑنی اوکھے موڑ دے جدے نویاں نویاں لائیاں نی
دولت مند تے نیک نصیب اے
راہنی ”درؔد؎“ ہمیش قریب اے
اوہ ہِن سرکار دی لوڑ دے جدے نویاں نویاں لائیاں نی
سائیں بنڑنی اوکھے موڑ دے جدے نویاں نویاں لائیاں نی
No comments:
Post a Comment