دوھڑہ نمبر1
بختاں دی نرم گھگھوٹی وچ سداں سُکھ پئے دینی لوری
آپوں کسیاں نال مُناسب نئیں مُونہہ کھوئی تے سینہ زوری
سچا توں وی ہیں تیرے شہر دے پاسے سانوں دل جُو رکھدائے ٹوری
شالا ”درؔد؎“ کسے دے ہتھ نہ آوے انسان دی کائی کمزوری
دوھڑہ نمبر2
میرا خط میری ہتھ جوڑی سمجھیں بختاں دی فوج دا مُوہری
میرے صبر دے پھُل جھُلسیندی پئی اے افکار دے تھل دی لوری
دے حوصلے ”درؔد؎“ نوں قربت دے ملاقات دی چھِک نئیں ڈوری
نئیں تاں جسم دے لُگڑے وِیہڑے چوں میرے ساہ ہو ویسن چوری
دوھڑہ نمبر3
جے بچنڑاں ہیئی بدنامیاں توں رکھیں اندرے اندر دی چوری
رہویں بالکل ترکڑا غلط وِساہ دی کوئی جتنڑی دیوی لوری
کسے سجنڑ نوں اپنڑی زندگی دی دَسیں ”درؔد؎“ نہ کائی کمزوری
سدھی سِر اِچ آسیا دے بیٹھوں ہتھیں کئیں دے جدنڑ ڈنگوری
دوھڑہ نمبر4
میں وی کملا ہَم ہمدرد سمجھ کے تینوں دَس بیٹھم کمزوری
چلو شکر اے جھبدے لبھ گئی اے تیرے غلط وِراگ دی چوری
تیتھے راضی آں بخت دے پیگھے وِچ سداں دیوی دولت لوری
کم کوئی نئیں آندی بھیڑ دے وِچ کدی منگی ہوئی ”درؔد؎“ ڈنگوری
No comments:
Post a Comment